أكيد خطر على بالك قبل كده سؤال إزاي أقوي من موقفي و أقوي من حالتي و ملفي قبل ما أقدم على فيزة أسبانيا أو فيزة ألمانيا أو فيزة هولندا أو فيزة فرنسا أو أي فيزه من فيزة دول شنجن !!
في البوست ده هتعرف شوية حاجات مهمه جداً هتقوي من حالتك و هتعلي من نسبة قبولك جداً سواء كنت أول مره تقدم على فيزة دول شنجن او سواء قدمت قبل كده و إترفضت و عايز تقدم تاني بس عايز تقوي من موقفك أكتر قبل ما تقدم
1 - كشف الحساب البنكي
كشف الحساب البنكي يعتبر أهم ورقه في الملف كله ، و عشان كده لازم تهتم بيه جداً و تشتغل عليه فتره قبل ما تقدم على فيزة دول شنجن ، بإنك تخلي كشف الحساب قوي و منتظم بينزل عليه المرتب كل شهر ، او لو بتقبض كاش تكون بتعمله إيداع في وقت منتظم كل شهر ، و يكون كشف الحساب متوافق مع الاتش ار اللي متقدم ، و عليه حركات سحب و إيداع و مشتريات و دفع فواتير بالفيزا على مدار الشهر
2 - سفرياتك السابقه ( ترافيل هيستوري )
سفرياتك السابقه ليها عامل كبير بإنها بتدعم موقفك جداً ، بإنك بتثبتلهم بيها إنك متعود على السفر فعلاً و ملتزم و بتسافر و بترجع ، فلو في مقدرتك تاخد كام سفريه لدول سياحيه فيزتها سهله ده بيعلى من موقفك جداً و بتكون حالتك أفضل
3 - ميعاد سفرك
ميعاد السفر مهم جداً لإثبات إنك رايح لغرض السياحه فعلاً ، فمهم جداً تراعي ذكر ميعاد سفرك يكون في أشهر المواسم السياحيه للبلد اللي هتقدم منها ، بالذات لو أول مره شنجن
مش مقنع خالص تكون أول مره تسافر و مقدم لدوله في وقت مافيهوش موسم سياحي و مافيهوش سياح و درجة الحراره تحت الصفر و سيئه جداً و مقدملهم إنك عايز تروح تتفسح في البلد في الوقت ده و صحاب البلد نفسهم ما بيطلعوش من البيت بسبب كميات التلج
و ما تنساش تشوف من هنا أهم الأسئله و الإستفسارات المهمه جداً الخاصه بفيزة دول شنجن
4 - إثبات روابط ملكيه
إثباتك لممتلكات في بلدك ده بيدعم موقفك جداً بإن عندك روابط ملكيه في بلدك و بالتالي هترجعلها تاني ، فلو عندك أي أوراق ملكيه زي عربيه ، شقه ، ارض أو ملكيه لأي حاجه تانيه ده بيدعم الموقف جداً و بيعلي من نسبة قبولك
لو إهتميت و إشتغلت على الحاجات دي الملف بتاعك هيكون أقوى و هيعلى من نسبة قبولك جداً
