فيزا شنجن
لو ناوي تقدم على فيزة شنجن أكيد عندك أسئله كتير بتدور في بالك زي إيه هي دول شنجن ؟ و إيه شروط التقديم لفيزة شنجن ؟ وهل لو إترفضت لازم تستنى ٦ شهور قبل ما تقدم تاني ؟!في البوست ده هتلاقي إجابات لأكتر الأسئله اللي بتدور في بالك عن فيزا شنجن و هتعرف إزاي تزود فرص قبولك للحصول على فيزا شنجن ، و كمان تفاصيل مهمه عن كشف الحساب البنكي و أفضل وقت للسفر الى دول اوروبا ، تابع البوست للآخر علشان تكون جاهز جداً قبل ما تقدم و تتلافى الرفض من فيزة شنجن
 |
| إجابه عن أكتر الأسئله المهمه جداً عن فيزا شنجن هتخليك تاخد فيزة شنجن بكل سهوله |
يعني إيه شنجن ؟! و يعني إيه فيزة شنجن ؟!
شنجن دي إسم قريه في دولة لوكسمبورج في الحدود مع فرنسا و ألمانيا ، و إتعمل فيها إتفاقيه إتسمت إتفاقية شنجن بالاسم ده نسبه لاسم القريه دي ، و إتفاقية شنجن دلوقتي بتضم ٢٩ دوله
ال ٢٩ دوله دول إسمهم دول شنجن ، و بالتالي لما تاخد فيزة أي دوله فيهم بتقدر تتنقل بين باقي الدول الأعضاء في شنجن عادي جداً
إيه هما دول شنجن ؟!
دول شنجن هما :
أسبانيا 🇪🇦 - ألمانيا 🇩🇪 - هولندا 🇳🇱 - فرنسا 🇨🇵 - إيطاليا 🇮🇹
بلچيكا 🇧🇪 - اليونان 🇬🇷 - المجر 🇭🇺 - البرتغال 🇵🇹 - بولندا 🇵🇱
سويسرا 🇨🇭 - النمسا 🇦🇹 - السويد 🇸🇪 - الدنمارك 🇩🇰 - النرويج 🇳🇴
فنلندا 🇫🇮 - آيسلندا 🇮🇸 - ليتوانيا 🇱🇹 - إستونيا 🇪🇪 - لاتفيا 🇱🇻
التشيك 🇨🇿 - لوكسمبورج 🇱🇺 - ليختنشتاين 🇱🇮 - سلوڤاكيا 🇸🇰 - سلوڤينيا 🇸🇮
مالطا 🇲🇹 - كرواتيا 🇭🇷 - رومانيا 🇷🇴 - بلغاريا 🇧🇬
إيه هما دول شنجن اللي بتطلب كشف الحساب البنكي يكون لآخر ٣ شهور فقط ؟!
مافيش ، كل دول شنجن دلوقتي بتطلب كشف الحساب البنكي يكون لآخر ٦ شهور
و ده فيديو مهم جداً عن إزاي تقوي حسابك البنكي و يخليك تاخد فيزة أي دوله بكل سهوله
أقدر أقدم تاني بعد الرفض في دول شنجن بقد إيه ؟! سمعت إن لازم أستنى ٦ شهور عشان أقدر أقدم تاني هل الكلام ده صح ؟!
لا مش صح خالص ، تقدر تقدم من تاني يوم عادي جداً ، أول ما تلاقي مواعيد دول شنجن متاحه بتحجز ميعاد و تحضر ورقك تاني و تقدم عادي جداً سواء في مكتب BLS او مكتب TLS او مكتب VFS
بس أهم حاجه قبل ما تقدم تاني على طول ، تعالج الأول أسباب الرفض من فيزة شنجن و تشتغل على ملفك و تقويه أكتر
و شوف في البوست ده حاجات مهمه لو عملتها هتعلي من نسبة قبولك جداً في فيزة شنجن إضغط هنا
هل إختيار توقيت السفر ليه عامل مهم في القبول ؟!
طبعاً ، و دي نقطه مهمه جداً جداً و ناس كتير بتغفلها و بتكون ثغره في ملفهم و ممكن تتسبب في الرفض
إختيار توقيت السفر حاجه مهمه جداً
يعني مثلاً اسبانيا أفضل شهور سياحيه فيها هي :
شهر ٣ و ٤ و ٥
و شهر ٩ و ١٠ و ١١
حتى لو هتقدم مثلاً في شهر ١٢ بس تكتب إنك هتسافر مثلاً في شهر ٣ او ٤
لان ده غلط كبير جداً ناس كتير بتقع فيه بالذات لو باسبورهم أبيض و بيكتب إنه هيسافر مثلاً في شهر ١
اللي هوا إنت رايح تعمل إيه لوحدك في الضلمه !! 😄
فلازم تراعي جداً توقيت السفر يكون في المواسم السياحيه لدول اوروبا اللي هتقدم فيها
لاكن لو إنت بتسافر كتير و مش أول مره شنجن و باسبورك مليان سفريات فعادي و طبيعي جداً إنك متعود على السفر و حابب تجرب الدوله دي في مواسم مختلفه من السنه
هل ممكن أقدم على فيزة دول شنجن بكشف حساب ڤوداڤون كاش بدل كشف الحساب البنكي ؟!
ڤوداڤون كاش ما ينفعش يحل محل الحساب البنكي في التقديم على فيزة شنجن
و لكن ممكن تقدم كشف حساب ڤوداڤون كاش كدعم لموقفك لشغلك مش أكتر ( لاكنه مش مكان الحساب البنكي )
و طالما ناوي للسفر و بتخطط ليه عوض أي تحويلات لڤوداڤون كاش بعد كده لإنستا باي لإنها هتبقى بفايده ليك
هل الأوراق اللي قدمتها في ملف فيزة شنجن بترجع في حالة الرفض ؟!
مافيش أي أوراق بترجع ولا في حالة القبول ولا في حالة الرفض من فيزة دول شنجن
و ما تقلقش أوراق الملكيه اللي بتقدمها مش بياخدوا أصول ، بياخدوا صوره للأصل و الترجمه
لاكن بتاخد معاك الأصل عشان ممكن الموظف يشيك عليهم منك و هيدهملك تاني
هل التأخير في الرد في التقديم على فيزة شنجن معناه رفض الفيزا ؟!
الرد بسرعه او التأخير في الرد مش مقياس للقبول او الرفض خالص ، فيه ناس إترد عليهم بسرعه و إترفضوا ، و ناس إترد عليهم بسرعه و إتقبلوا ، و ناس إتأخر الرد عليهم جداً و إترفضوا ، و ناس إتأخر الرد عليهم جداً و إتقبلوا
وصلني رساله إن الباسبور جاهز للإستلام هل فيه طريقه أعرف بيها قبول ولا رفض قبل ما أستلمه ؟!
مافيش أي طريقه تعرف بيها القبول او الرفض غير لما تستلم الباسبور ، يا هتلاقي الباسبور معاه ورق مكتوب فيه أسباب الرفض ، او هتفتح الباسبور هتلاقي فيه فيزة شنجن على الباسبور
حجز الطيران المبدئي بيتكنسل بعد ٤٨ ساعه هل كده ممكن أترفض ؟!
لأ خالص ، ده مجرد حجز مبدئي و طبيعي إنه بيتكنسل تلقائي بعد ٢٤ ساعه ل ٤٨ ساعه على حسب شركة الطيران اللي إنت عامله من عليها
و سفارات دول شنجن عارفين إنه مجرد حجز مبدئي ، لإنك مش مطلوب منك أي حجز طيران مدفوع بالكامل طول ما إنت لسه ما أخدتش الفيزا
و الغرض من حجز الطيران المبدئي هو إنهم مجرد فقط بيشوفوا متوسط تكلفة سعر الطيران اللي هتحجزه بالمقارنه مع المبلغ المتقدم في كشف الحساب البنكي
و شوف في البوست ده أفضل و أشهر شركات الطيران الإقتصادي حوالين العالم إضغط هنا
ينفع اللى معاه فيزة أي دوله في شنجن يدخل من أي دوله شنجن تانيه ؟!
قانوناً طالما معاك فيزة شنجن ينفع تخش و تخرج من أي بلد في دول شنجن ، لاكن واقعياً ممكن يرخموا عليك في المطارات ، و عشان لو جيت تقدم تاني يكون وضعك أفضل حاجه
فعلشان كده يفضل تخش و تخرج من البلد اللي إديتك الفيزا على قد ما تقدر ، بالذات لو أول مره شنجن
عندي ميعاد لتسليم ورقي كمان شهر ، أبدأ أحضر ورقي إمتى ؟!
تبدأ تحضر ورقك قبل ميعادك بإسبوعين كده مناسب ، و كشف الحساب البنكي و حجز الطيران المبدئي تخليهم آخر حاجه تحضرهم خالص
كشف الحساب البنكي قبل ميعاد التقديم في دول شنجن بيوم او يومين مناسب ، و حجز الطيران المبدئي قبل ميعاد التقديم في دول شنجن بيوم ، او يوم ميعادك لو هتلحق تطبعه الصبح بدري ونت رايح